Política de privacidade

01Quen é o responsable

O responsable do tratamento dos datos que nos facilitas a través desta web é NM Servicios Inmobiliarios 2026, S.L., que presta este servizo co nome comercial «luzgasia». Estes son os seus datos de identificación:

Para calquera cuestión sobre privacidade, incluído o exercicio dos teus dereitos, podes escribirnos a info@luzgasia.com.

02Que datos tratamos

Datos de contacto que nos facilitas: nome, email, teléfono, código postal e tipo de cliente.

A túa factura de luz ou gas e os datos que se extraen dela: titular, CUPS, enderezo de subministración, comercializadora actual, potencia, tarifa, consumo, período e importes. Se prefires non subir a factura, podes darnos no seu lugar o teu consumo, a túa potencia e o que pagas, ou o CUPS (o código do teu punto de subministración).

Se comparas co teu CUPS e nos dás permiso para comprobar que a subministración é túa: o número do teu DNI, NIE ou CIF, que escribes ti (nunca unha fotografía), e a resposta desa comprobación. Se a resposta é afirmativa, tamén a potencia e o consumo oficiais dese punto de subministración.

Datos técnicos: o enderezo IP e o navegador desde os que aceptas cada permiso e desde os que asinas. Gardámolos precisamente para poder acreditar que aceptaches e cando. Tamén gardamos o enderezo IP desde o que inicias a túa solicitude, para previr a fraude e os envíos automáticos.

Se decides contratar: o teu DNI/NIE (o número e unha fotografía das dúas caras), a túa conta bancaria (IBAN), a túa sinatura e, segundo o teu caso, o CIF e a razón social da túa empresa, a escritura ou o contrato de alugueiro que acredita que podes contratar esa subministración e, se cambias o titular, o número de documento do titular anterior, que comprobamos coa distribuidora. Non os pedimos antes e, cando os pedimos, dicímosche para que. O IBAN úsase unicamente para domiciliar o recibo da subministración que contratas: nin se comparte con terceiros alleos á alta nin se emprega para ningún outro cobro.

Se un colaborador noso xestiona a túa alta: pode abrir un expediente ao teu nome cos teus datos de contacto e a túa factura (ou os teus datos de consumo), despois de que ti llo pedises. Antes de abrir ningún expediente, quen xestiona a túa alta (un colaborador noso ou a nosa oficina) pode gardar nunha ficha ao teu nome os teus datos de contacto (nome, correo, teléfono, se es particular, autónomo ou empresa e, de ser o caso, o teu nome comercial ou razón social); o teu DNI, o teu CIF e a túa conta bancaria só se piden dentro dun expediente cunha tarifa que ofrecerche. Cando o expediente ten os datos necesarios escribímosche para que o revises, e non se tramita nada sen que o autorices e o asines ti desde a ligazón que che enviamos por correo (o colaborador tamén pode facercha chegar el mesmo, por exemplo por WhatsApp). Se o expediente non chega a completarse, non respondes ou te opós, destruímos os datos que nos deu (os prazos, no apartado 6).

Se nos pides directamente que preparemos o teu cambio —por teléfono, na nosa oficina, por correo ou por WhatsApp— ou nolo pide outra persoa no teu nome (por exemplo, o propietario da vivenda, un familiar ou a túa xestoría), o noso equipo abre ao teu nome unha ficha cos teus datos de contacto e un expediente por cada subministración, coa túa factura ou os teus datos de consumo, e anota o nome de quen nolo pediu. Se os datos nolos dá outra persoa, dicímoscho no primeiro correo. Non se tramita nada sen que o autorices ti: desde a ligazón que che enviamos, aquí na nosa oficina nun dispositivo noso (comprobando antes o teu DNI) ou asinando a man o documento impreso.

Se chegaches por unha recomendación: se entraches coa ligazón dun colaborador ou coa invitación doutro cliente (o noso programa «Invita e gaña»), gardamos quen te recomendou para poder pagarlle a súa comisión ou concederlle o seu cupón se contratas. Esa persoa non recibe os teus datos: só ve que alguén que chegou pola súa ligazón avanzou ou contratou, sen o teu nome nin o teu contacto.

De que campaña chegas: se entras na web desde unha campaña nosa (un anuncio, un correo ou unha ligazón promocional), o enderezo da páxina trae unhas etiquetas que din de que campaña vés: os parámetros que empezan por «utm_» e, nos anuncios de Google, «gad_source» e «gad_campaignid». Identifican a campaña, non a persoa. Lémolas, viaxan nas ligazóns internas mentres navegas —para non perdelas ao cambiar de páxina ou de idioma— e, se pides a túa análise, gardámolas xunto á túa solicitude.

O identificador de clic dun anuncio: se chegas desde un anuncio de Google ou de Microsoft, a propia plataforma engade ao enderezo un identificador dese clic («gclid», «gbraid» ou «wbraid» en Google; «msclkid» en Microsoft). A nós non nos di quen es, pero a plataforma si pode relacionalo co clic que fixeches, así que o tratamos con máis coidado: só viaxa na ligazón que te leva á análise desde a páxina á que chegaches, non polo resto da web; só se garda no teu navegador se aceptas as cookies opcionais (cookie «lg_campana», 30 días); e, se pides a túa análise, gardámolo xunto á túa solicitude mentres decides se nos deixas comunicarlle o teu resultado a esa plataforma (apartado 3). Se dis que non, borrámolo nese mesmo momento; se dis que si, conservámolo durante o prazo que indica o apartado 6.

Medición de uso da web (sen cookies): para saber cantas persoas ven as páxinas públicas e o comparador, e por que páxinas navegan, rexistramos nos nosos servidores un identificador pseudónimo —unha pegada cifrada cunha chave do noso servidor, calculada a partir do teu enderezo IP e do teu navegador— xunto coa data e as páxinas públicas que visitas. Cando chegas desde unha campaña, esa visita cóntase cunha pegada que cambia cada día, de xeito que as túas visitas de días distintos non se poden relacionar entre si. Non usamos cookies nin ningún almacenamento no teu dispositivo para isto, non a usamos para identificarte e elimínase automaticamente aos 6 meses. Base legal: interese lexítimo en medir e mellorar o noso propio servizo (art. 6.1.f RGPD).

Rexistros de seguridade: para protexer a web fronte a abusos (intentos de acceso indebido, envíos automáticos, ataques), rexistramos o enderezo IP e os datos técnicos das peticións sospeitosas, e podemos bloquear temporalmente un enderezo. Nesa protección axúdannos dous servizos externos, que explicamos no apartado 5: Cloudflare Turnstile, nos formularios, e a rede de seguridade de CrowdSec.

Se nos escribes: polo formulario de contacto ou a info@luzgasia.com, tratamos o teu nome, o teu email, o teu teléfono se nolo dás, a túa mensaxe, as nosas respostas e, no formulario, o enderezo IP desde o que escribes.

Se es colaborador: o teu nome, o teu email, o teu teléfono, o teu contrasinal (gardado de forma que nin sequera nós podemos lelo) e, se activas a verificación en dous pasos, a súa chave, cifrada; para valorar a túa solicitude, o que nos contas do teu perfil profesional ao darte de alta (a que te dedicas, a túa experiencia, se tes carteira de clientes, como pensas captalos, con que clientes queres traballar, que esperas da colaboración e como nos coñeciches); para verificar a túa conta, o teu DNI ou NIE polas dúas caras, o xustificante da túa actividade como autónomo ou da túa sociedade e a túa declaración; para pagarche, a conta bancaria na que che pagamos, quen é o seu titular (autónomo ou empresa), o teu NIF, NIE ou CIF e a retención do IRPF que nos declares; as túas ligazóns, as altas que che atribuímos e as túas comisións. Na clasificación entre colaboradores apareces cun alias.

A túa decisión sobre as cookies: gardamos se aceptaches ou rexeitaches as cookies opcionais, cun identificador aleatorio que tamén queda no teu navegador, a versión da política de cookies e a data. Non gardamos a túa IP nin o teu navegador con ela. Serve para poder demostrar que decidiches.

03Para que usamos os teus datos e con que base legal

Non creamos perfís publicitarios nin usamos os teus datos para amosarche anuncios personalizados.

Non usamos unha única base legal para todo. Cada finalidade ten a súa, e iso cambia o que podes decidir:

• Analizar a túa factura (ou os datos que nos dás), calcular o teu aforro e amosarche o resultado: facémolo porque nolo pediches ti, como paso previo a un posible contrato (art. 6.1.b RGPD). Non necesitamos o teu consentimento para isto, pero si podes pedirnos que borremos os teus datos cando queiras.
• Escribirche por email sobre a túa análise e o necesario para continuar con ela (por exemplo, a ligazón para entrar na túa área se decides contratar): forma parte do servizo que nos pediches (art. 6.1.b RGPD).
• Axudarche a completar unha contratación que deixaches a medias: se creaches a túa conta e non chegaches a finalizar o proceso, podemos contactar contigo para resolver o que falte. É a execución do que ti iniciaches (art. 6.1.b RGPD), non unha chamada comercial.
• Comprobar coa túa distribuidora que a subministración é túa (só na comparación por CUPS): co teu consentimento (art. 6.1.a RGPD), que é opcional. Sen el calculamos co que nos digas e non che amosamos ningún dato da subministración.
• Enviarche ofertas ou chamarte para venderche algo: só co teu consentimento expreso (art. 6.1.a RGPD), que é opcional, independente e revogable en calquera momento. Non marcalo non cambia nada da túa análise.
• Chamarte para explicarche a valoración da túa subministración ou estudar un caso para o que non temos tarifa publicada: só se o pides expresamente marcando a caixa correspondente, na pantalla do teu resultado ou, se nos dás os teus datos sen subir a factura, no paso de permisos. É o teu consentimento (art. 6.1.a RGPD), revogable en calquera momento, e, á vez, a petición previa que esixe a normativa do sector eléctrico para unha chamada. Non pechamos contratos por teléfono.
• Xestionar a túa contratación e o cambio de comercializadora: execución do contrato e da autorización que asinas (art. 6.1.b RGPD).
• Valorar as solicitudes para ser colaborador, xestionar o programa de colaboradores e pagar as súas comisións: medidas previas ao acordo que nos pides e execución do acordo de colaboración (art. 6.1.b RGPD), e cumprimento das nosas obrigas contables e fiscais, como aplicar aos pagamentos dun colaborador autónomo a retención do IRPF e ingresala na Axencia Tributaria (art. 6.1.c RGPD). Gardar quen te recomendou, para poder retribuírlle: interese lexítimo en cumprir o noso programa de recomendacións (art. 6.1.f RGPD).
• Protexer a web e previr a fraude: interese lexítimo (art. 6.1.f RGPD). Inclúe comparar a IP e o navegador desde os que se asina unha autorización cos do colaborador que xestiona ese expediente ou, se o prepara a nosa oficina, cos enderezos desde os que traballa a oficina, para detectar sinaturas que non fixese o titular.
• Atender as mensaxes que nos envías: escríbesnos ti, e tratamos os teus datos para responderche (interese lexítimo, art. 6.1.f RGPD).
• Saber que campañas funcionan: relacionamos a túa solicitude coa campaña da que chegaches para calcular cantas solicitudes e contratos trae cada campaña e canto nos custa cada contrato. Só nos nosos informes internos: non llo comunicamos a ninguén. Base legal: interese lexítimo en medir a eficacia da nosa propia publicidade (art. 6.1.f RGPD). Podes opoñerte en calquera momento, e quitamos ese dato da túa solicitude sen borrar a solicitude.
• Contarlle á plataforma da que chegaches ata onde chegou a túa solicitude: só se chegaches desde un anuncio de Google ou de Microsoft, e só se nos dás o teu permiso para esa plataforma en concreto (art. 6.1.a RGPD): un por plataforma, opcional, sen marcar de antemán e revogable. Sen el non lle comunicamos nada e borramos o identificador de clic. Que lle comunicamos, no apartado 5.

04Un servizo 100 % online: cando contactamos contigo

Todo o proceso connosco —análise, proposta, documentación e sinatura da túa autorización— faise desde a web: non necesitas falar con ninguén nin esperar a que te chamemos para avanzar.

Hai tres excepcións. A primeira é para axudarte: se creaches a túa conta e deixaches a contratación a medias, podemos poñernos en contacto contigo para completar o que falta. Se prefires que non o fagamos, dínolo e non volveremos contactar contigo.

A segunda: se lle pediches a un colaborador noso que xestione a túa alta, é el quen te atende.

A terceira: se nos pides que o preparemos nós —por teléfono, en persoa, por correo ou por WhatsApp— ou nolo pide outra persoa no teu nome, atendémoste por esa vía.

Fóra deses casos, non facemos chamadas comerciais a quen non as pediu expresamente marcando a caixa correspondente. É unha decisión nosa e ademais é o que esixe a normativa do sector eléctrico.

05Con quen compartimos os teus datos

Non vendemos os teus datos. Só chegan a quen fai falta para prestarche o servizo, a quen ti nos autorizas expresamente a comunicarllos ou a quen a lei nos obriga a comunicarllos:

Para ler automaticamente os documentos que nos achegas traballamos con dous provedores de intelixencia artificial, que actúan como encargados do tratamento seguindo as nosas instrucións e baixo o contrato que esixe o artigo 28 do RGPD: Google LLC (Estados Unidos), que é o que usamos habitualmente, e Anthropic PBC (Estados Unidos), ao que só recorremos se a lectura falla por unha avaría do servizo —unha caída, un tempo de espera esgotado ou un erro do provedor—; nese caso o documento envíase a Anthropic para que o lea en lugar de Google. Nunca o mandamos aos dous para comparar lecturas. Se cambiamos de provedor, actualizaremos antes esta política, e nos nosos rexistros internos queda constancia de que provedor leu cada documento.

• Lectura automática da túa factura: a imaxe ou o PDF que subes envíase a un deses dous provedores para extraer os seus datos (titular, CUPS, enderezo de subministración, potencia, tarifa, consumo, período e importes). Trátano unicamente para devolvernos esa lectura, e ningún dos dous utiliza os teus datos para adestrar nin mellorar os seus modelos: as condicións que temos subscritas con eles exclúeno expresamente.
• Lectura automática do teu documento de identidade: é opcional e só a facemos se nos dás un permiso específico, que che pedimos na túa área privada cando esta función está dispoñible. Con ese permiso, a fotografía do DNI, NIE ou pasaporte que subes ao contratar envíase a Google (e, só se esa lectura falla por unha avaría, a Anthropic, igual que coa factura) para propoñerche o teu nome, os teus apelidos e o teu número xa escritos, que ti confirmas ou corriges, coas mesmas garantías que a lectura da factura. Sen ese permiso, ningunha imaxe do teu documento sae dos nosos sistemas e eses datos escríbelos a man.
• Transferencias fóra do Espazo Económico Europeo: os dous provedores están establecidos nos Estados Unidos, así que enviarlles un documento supón unha transferencia internacional de datos. Ampáranse nas garantías do capítulo V do RGPD: as cláusulas contractuais tipo aprobadas pola Comisión Europea (art. 46.2.c) e, nos provedores adheridos, a decisión de adecuación do Marco de Privacidade de Datos UE-EUA (art. 45). Podes pedirnos unha copia desas garantías escribíndonos a info@luzgasia.com.
• O cálculo do teu aforro faise integramente nos nosos propios sistemas: ningún terceiro recibe os teus datos para comparalos.
• Comprobación de titularidade (comparación por CUPS): só co teu permiso, o teu CUPS e o teu número de documento van a unha das comercializadoras coas que traballamos para esta consulta (Gana Energía ou Naturgy), que lle pregunta á túa distribuidora se ese documento figura como titular dese punto. Contestan si ou non e, cun si, a potencia e o consumo do punto. Non se dá de alta nada nin se modifica o teu contrato.
• Se decides contratar: a comercializadora que elixas e a empresa distribuidora reciben os datos imprescindibles para tramitar a alta. Verás o nome desa comercializadora antes de asinar nada.
• Colaboradores: se un colaborador xestiona a túa alta porque ti llo pediches, ve os datos do teu expediente —incluídos o teu DNI e o teu IBAN completos— mentres dura a xestión, para poder completala contigo. Se a xestión remata ou a retiras, deixa de velos.
• Plataformas de publicidade, só co teu permiso para esa plataforma: Google Ireland Limited (Google Ads), se chegaches desde un anuncio noso en Google, e Microsoft Ireland Operations Limited (Microsoft Advertising), se chegaches desde un anuncio noso en Microsoft (Bing). Que lle comunicamos: o identificador de clic que a propia plataforma puxo no enderezo da páxina, a data e a hora do resultado, que resultado foi (que analizamos a túa factura cunha cifra de aforro, que che enviamos o contrato ou que a túa alta quedou activa), un código de referencia sen significado e distinto para cada resultado cando a plataforma o admite e, se é o caso, un valor económico que reflicte o que ese resultado vale para nós, nunca o que ti aforras nin o que pagas. Nunca o teu nome, os teus datos de contacto, a túa factura, o teu DNI nin o teu IBAN.
• Para que o usa a plataforma: para atribuír ese resultado ao clic no noso anuncio, darnos informes de cantos resultados trae cada anuncio e axustar a entrega das nosas campañas. Indicámoslle que non use este dato para personalizarche anuncios. Cada plataforma trata ese dato como responsable, conforme á súa propia política de privacidade. Que fai cada unha cos datos que recibe dos seus anunciantes: Google, https://policies.google.com/technologies/partner-sites · Microsoft, https://privacy.microsoft.com/privacystatement. Google Ireland Limited e Microsoft Ireland Operations Limited están establecidas na Unión Europea; se tratan os datos fóra do Espazo Económico Europeo, fano coas garantías que describen nesa información.
• Se chegas á web desde un anuncio de calquera outra plataforma ou rede social, só rexistramos de que campaña vés (apartado 2): a esa plataforma non lle comunicamos nada.
• Provedores tecnolóxicos, que actúan por conta nosa e baixo contrato de encargo do tratamento: o aloxamento da web e da base de datos, Hetzner Online GmbH, en centros de datos situados en Alemaña; e o correo electrónico (o envío dos nosos correos e a caixa de correo info@luzgasia.com), Google Workspace, de Google Ireland Limited, que pode tratar datos fóra do Espazo Económico Europeo coas garantías do capítulo V do RGPD (cláusulas contractuais tipo e Marco de Privacidade de Datos UE-EUA).
• Vídeos de axuda da área de colaboradores: cárganse desde YouTube (Google) só cando premes para reproducilos. Explicámolo na política de cookies.
• O dominio luzgasia.com está rexistrado con Cloudflare, Inc., que tamén xestiona os seus servidores de nomes (DNS). O tráfico da web non pasa por Cloudflare: o único que recibe Cloudflare é o que explicamos no punto seguinte.
• Protección contra envíos automáticos: no formulario de contacto e nas pantallas de acceso ás áreas de clientes e de colaboradores usamos Cloudflare Turnstile, de Cloudflare, Inc. (Estados Unidos), que comproba que quen usa o formulario é unha persoa e non un programa automático. Para iso o teu navegador conéctase con Cloudflare, que recibe o teu enderezo IP, datos técnicos do teu navegador e da túa conexión e a páxina desde a que se fai a comprobación; non recibe o que escribes no formulario. Cloudflare trata eses datos por conta nosa e, para mellorar a súa propia detección de programas automáticos, tamén como responsable, segundo a súa política: https://www.cloudflare.com/turnstile-privacy-policy/. A transferencia aos Estados Unidos ampárase no Marco de Privacidade de Datos UE-EUA (art. 45 RGPD) e nas cláusulas contractuais tipo (art. 46.2.c). Base legal: interese lexítimo en protexer o servizo fronte a abusos (art. 6.1.f RGPD).
• Rede de seguridade colaborativa: o noso servidor usa CrowdSec, de CrowdSec SAS (Francia). Cando unha conexión dispara unha das súas alertas de ataque (por exemplo, intentos repetidos de entrar sen permiso ou de buscar fallos na web), compartimos con CrowdSec o enderezo IP desa conexión, o tipo de alerta e a data; a cambio recibimos a súa lista de enderezos que están a atacar outros servidores, para bloqualos antes de que cheguen. De quen usa a web con normalidade non compartimos nada. CrowdSec e nós somos corresponsables dese tratamento; a súa política: https://www.crowdsec.net/privacy-policy. Base legal: interese lexítimo na seguridade da web (art. 6.1.f e considerando 49 do RGPD).
• Axencia Tributaria: se es colaborador, declarámoslle o que che pagamos e, se es autónomo, a retención do IRPF que che practicamos, co teu nome e o teu NIF, cando a normativa fiscal nos obriga a facelo (art. 6.1.c RGPD).

06Canto tempo conservamos cada cousa

Non gardamos nada por se acaso. Estes son os prazos, e dicímosche tamén cando o borrado o aproba unha persoa en lugar de facerse automaticamente:

• O arquivo da túa factura: 30 días desde a subida, e só 24 horas se non chegaches a completar a análise. Se a análise falla, podemos conservala ata 7 días para revisar por que fallou. Se a achega un colaborador ou a nosa oficina nun expediente ao teu nome, consérvase mentres o expediente agarda a túa resposta: como moito 7 días mentres o colaborador o prepara e, despois, ata 30 días desde o último aviso que che enviamos (ou desde que completou os teus datos, se aínda non che chegou ningún). Destrúese en canto te opós ou vence ese prazo sen resposta.
• A ficha cos teus datos de contacto que abre un colaborador ou a nosa oficina: mentres teña algún expediente teu en marcha. Se non ten ningún, como moito 7 días; e se te opós, non respondes ou retiras a xestión, destrúese nese momento.
• O número de documento para a comprobación de titularidade: 30 días. Conservamos a resposta (si ou non), a súa data e que comercializadora a fixo, porque é a proba de que se comprobou.
• Os datos dunha solicitude que non chega a contrato (os teus datos de contacto, o que lemos da túa factura e a túa análise): non se borran de forma automática. Cada mes preparamos unha proposta de borrado das solicitudes e contas sen actividade nos últimos 30 días, que unha persoa do noso equipo revisa e aproba; e as que sigan aí revisámolas para suprimilas ao cumprir 12 meses desde o teu último contacto.
• O teu DNI, o teu IBAN e os documentos de contratación: 90 días desde que se formaliza a alta, e 7 días se nunca chegaches a finalizar. Cumprido o prazo, o seu borrado apróbao e execútao unha persoa do noso equipo.
• Se contrataches: os datos da relación consérvanse mentres dure e despois o tempo que esixen as obrigas legais e fiscais.
• O rexistro dos teus permisos: mentres conservemos a túa solicitude ou a túa conta e, se contratas, mentres dure a relación e 3 anos máis, porque é a proba de que actuamos correctamente.
• De que campaña chegaches: mentres conservemos a túa solicitude, salvo que te opoñas antes.
• O identificador de clic de Google ou de Microsoft: se non chegas a decidir se nos dás permiso, 24 horas; se dis que non ou retiras o permiso, borrámolo nese mesmo momento; co teu permiso, 90 días desde o clic, que é o prazo no que a plataforma o admite. Pasado ese tempo conservamos só o feito de que chegaches desde un anuncio desa plataforma, nunca o identificador.
• O rexistro do que lle comunicamos a unha plataforma: bórrase coa túa solicitude. Se nos pides a supresión despois de que llo comunicásemos, conservamos só o código de referencia sen significado (ningún dato teu) durante o tempo necesario para pedirlle que o retire.
• A cookie «lg_campana»: 30 días no teu navegador. A túa decisión sobre as cookies: 400 días (uns 13 meses) no noso rexistro.
• Medición de uso e visitas de campaña: 6 meses.
• Mensaxes de contacto e as súas respostas: 2 anos, o prazo habitual dunha reclamación de consumo.
• Rexistros de seguridade con enderezo IP: 90 días. O rexistro dos enderezos que bloqueamos por abuso consérvase para poder detectar que ese abuso se repite; un bloqueo temporal deixa de aplicarse en canto vence. O que compartimos con CrowdSec consérvao CrowdSec segundo a súa propia política.
• Datos de colaborador: mentres manteñas a túa conta. Ao darte de baixa borramos os teus datos persoais e os teus documentos, e conservamos o histórico de comisións sen eles, porque é un rexistro contable que estamos obrigados a gardar. A única excepción é o que xa che pagamos: o teu nome, o teu NIF, os importes e a retención aplicada conservámolos bloqueados (art. 17.3.b RGPD e art. 32 LOPDGDD), só para atender a Axencia Tributaria e ata que prescriban as nosas obrigas fiscais sobre eses pagamentos, catro anos desde que remata o prazo para declaralos; despois borramos o teu nome, o teu NIF e a retención.
• Copias de seguridade: as copias diarias do servidor consérvanse 30 días; as copias que facemos xusto antes dun borrado definitivo, 90 días, agás a máis recente, que se conserva ata que a substitúe outra.
• Rexistros técnicos do servidor: os de accesos á web, un máximo de 30 días, sen identificadores de clic nin as ligazóns de acceso que che enviamos; o de erros, que pode recoller o enderezo completo dunha páxina, como moito 15 días.

07Os teus dereitos e como exercelos

Podes exercer os dereitos de acceso, rectificación, supresión, oposición, limitación e portabilidade. É gratuíto e responderémosche como máximo nun mes.

Se tes conta de cliente ou de colaborador, tes un botón de baixa dentro da túa propia área: non fai falta que escribas a ninguén nin que xustifiques nada. Para o demais, escríbenos a info@luzgasia.com.

Podes retirar en calquera momento, sen dar explicacións, calquera dos permisos que nos deses —comunicacións comerciais, a chamada para valorar o teu caso ou a comprobación coa túa distribuidora— escribíndonos a info@luzgasia.com, sen que iso afecte ao que fixemos antes con eles. Cada correo comercial que che enviemos levará ademais unha ligazón para darte de baixa.

Se nos deches permiso para comunicarlle o teu resultado a Google ou a Microsoft, podes retiralo cun clic: desde a túa área (tarxeta «Medición dos anuncios») ou, se non tes conta, desde a ligazón que che damos na pantalla do teu resultado. Tamén escribíndonos. En canto o retiras, borramos o identificador de clic e non comunicamos nada máis.

Podes opoñerte a que relacionemos a túa solicitude coa campaña da que chegaches: escríbenos e quitamos ese dato sen borrar a túa solicitude.

Se nos pides que borremos os teus datos e xa lle comunicaramos un resultado teu a unha plataforma de publicidade, pedímoslle que o retire.

Se consideras que non tratamos ben os teus datos, podes reclamar ante a Axencia Española de Protección de Datos (www.aepd.es).

08Seguridade

A túa factura transmítese cifrada, non é accesible mediante ningunha URL pública e só se serve a través de accesos autenticados.

O teu DNI, o teu IBAN e a túa sinatura gárdanse cifrados en repouso. Só os ven completos as persoas do noso equipo que tramitan a túa alta e, se o teu expediente o xestiona un colaborador, ese colaborador mentres dura a xestión, porque fan falta enteiros para dar a alta na comercializadora. Sempre queda constancia de quen os consultou e cando (como mínimo, unha anotación por persoa e por cada hora en que os consulta).

Aplicamos medidas técnicas e organizativas apropiadas fronte a accesos non autorizados e, antes de calquera borrado definitivo, facemos copia de seguridade para non destruír nada por erro.

09Decisións automatizadas

A análise da túa factura é automática: un sistema de intelixencia artificial extrae os seus datos (apartado 5) e o comparador calcula o teu aforro estimado coas tarifas do noso catálogo.

Non é unha decisión que produza efectos xurídicos sobre ti nin che afecte significativamente: é unha proposta informativa. Ti decides libremente se contratas ou non, e sempre podes pedirnos que unha persoa revise o resultado.

O aforro que amosamos é unha estimación baseada nos datos da túa factura ou, se non a subes, nos que nos indicas ou, co teu permiso, nos que constan na túa distribuidora. Se as contas non nos cadran, preferimos non darche ningunha cifra antes que darche unha inventada.

Como escollemos a tarifa que che recomendamos explicámolo nas condicións do servizo (apartado 2).